AFP ayaw isuko 5 bank account

Pursigido ang Armed Forces of the Philippines (AFP) na panatilihin ang lima sa 20 “unauthorized” bank account na nauna nang sinita ng Commission on Audit (COA) at ang P1.3 bilyon mula sa P1.8 bilyon deposit sa naturang mga account para mapondohan ang kanilang modernization program.

Ayon kay AFP chief of staff Gen. Jose Faustino Jr., isinara na nila ang 15 bank account pero hiniling na mapanatili lang lima dahil sa procurement program.

“There were 20 unauthorized bank accounts, and we have closed 15 of them, as of this date. One account in the United Coconut Planters Bank (UCPB) is intended for our modernization project which we cannot close … and we have accounts we requested to be retained,” sabi ni Faustino.

Matatandaang kinuwestiyon ni Senador Imee Marcos kung magkano pa sa P1.8 bilyon ang naibalik na sa National Treasury.

Sinabi ni Faustino naibalik na ang karamihan pero hindi nila maisauli ang P1.3 bilyon dahil ginagamit ito bilang pambayad para sa AFP modernization program.

Subalit sinabi ni Department of Budget and Management (DBM) Director Mary Anne Dela Vega na ang mga ahensiya ng pamahalaan ay inatasan na ibalik ang mga hindi otorisadong deposito sa National Treasury. (Kiko Cueto)

The post AFP ayaw isuko 5 bank account first appeared on Abante Tonite.