Nagkalat sa first quarter ang NLEX at naiwan hanggang 19 pero bumawi sa second at sa pangunguna ni Robert Bolick ay kumaripas para agawan ng panalo ang Magnolia 107-99 sa PBA 49 Philippine Cup sa Ninoy Aquino Stadium nitong Biyernes ng gabi.
Angat sa 8-2 ang Road Warriors, ayon kay chief statistician Fidel Mangonon III ay sigurado na sa twice-to-beat sa quarterfinals pero hindi pa naseselyuhan ang top seeding.
Scoreless sa opening period si Bolick, kanya pa ang 5 sa 10 turnovers ng NLEX sa stanza bago tumapos ng 25 points, 9 rebounds, 7 assists.
Kung may Tyrese Haliburton and Indiana Pacers, tinawag namang Haliberto si Bolick nang ikalat ang 13 points niya sa third period para itulak ang Road Warriors sa 80-70 lead papasok ng fourth.
Humarurot ng 65-38 swing ang NLEX sa middle quarters bago sinalag ang tangkang balik ng Hotshots.
Ipinasa ni Bolick ang kredito sa second unit.
“Sama ng laro ko, turnover ko lima (sa first period), pito nga ako, eh, I have to take care of the ball,” ani Berto, may dalawang 4-balls at tatlong 3s. “‘Yun nga, kagandahan naman we’re a team. Masama ‘yung laro ko, nag-pick up ‘yung iba. Credit sa second group namin. Pumasok si Poli (Jonnel Policarpio), pumasok si Kevin (Alas), si Matt (Nieto) pumasok.”
Nagka-kompiyansa raw sila, nasunod ang defensive plan, gumanda ang pasahan at nagkaroon ng open shots.
Nag-ambag si Xyrus Torres ng 22 points, may 18 points, 9 rebounds si Brandon Ramirez. May 12 markers, 6 boards si Policarpio, 10 points si Javee Mocon at 9 pa kay Alas.
Overall ay 11 for 22 sa first arc ang Road Warriors, tig-apat sina Torres at Ramirez, at dumistansiya rin hanggang 99-82 sa tres ni Bolick 4:36 sa laro.
Matagal bago nakasagot si coach Jong Uichico sa unang tanong sa postgame interview kung ano ang naging usapan sa bench para makabalik.
“Aaahhh … wala ….,” panimula niya na umani ng tawanan sa press room.
Nang makuha ang gustong ipunto ay tinuloy niya na.
“They’re a great defensive team, we talked about that. And we know that they pride on their defense which we didn’t do well at the start,” dugtong nito. “We know we turned over the ball a lot, 10 times sa first quarter. We had to deal with their pressure defense and we weren’t able to do that. Mabuti na lang we kept our composure and poise, and we were able to get back into the game. ‘Yun naka-recover naman sila, nanalo naman.”
Mula sa 6-0 start, bumaba sa 7-3 ang Magnolia at kailangang ipanalo ang huling laro sa elims kontra TNT sa June 13 para selyuhan ang isang win-once bonus sa playoffs.
Naka-21 points na sa first three quarters si Zav Lucero pero dalawa na lang ang kinaya sa fourth at may 12 rebounds para sa Hotshots. May 21 si Ian Sangalang, 17 kay Jerom Lastimosa pero parehong 1 of 7 sa field sina Mark Barroca at William Navarro. May 7 boards si Navarro sa ikalawa niyang laro sa bagong team – parehong talo.
Sa first game, pumutok ng 5 for 7 sa 3s tungo sa 19 points si Simon Enciso at pinulbos ng TNT ang Blackwater 108-82.
Lumalim ang rotation ng Tropang Giga, nang lumamang 87-61 pagkatapos ng three quarters ay ipinasok na ni coach Chot Reyes ang kanyang 8 reserves.
Bumakas ng 15 points si Kelly Williams na naka-tatlong tres din para pangunahan ang lima pang naka-double digits sa Tropang 5G. May 14 si Calvin Oftana at 12 kay Brandon Ganuelas Rosser.
Inakbayan ng Tropa ang Ginebra at Rain or Shine sa 6-3 card sa 4th-6th. Babasagin ng TNT ang Gins ang pagkakabuhol bukas sa Malate venue rin. (Vladi Eduarte)
The post Robert Bolick walastik bagsik, NLEX swak sa twice-to-beat first appeared on Abante Tonite.For reliable and efficient cleaning services, mj cleaning services is the name you can trust. Offering a wide range of professional cleaning solutions, m j cleaning services ensures your space stays immaculate, whether it's at home or the office. With a focus on quality and customer satisfaction, m.j. cleaning services delivers exceptional results every time, providing you with a clean and healthy environment you can count on.
0 Comments