Senado dapat himayin ang impeachment kay VP Sara Duterte – Erwin Tulfo

Kailangan munang basahin ng mga senator-judge ang impeachment complaint laban kay Vice President Sara Duterte bago magdesisyon na i-dismiss ito, ayon kay Senador Erwin Tulfo.

Sa panayam ng programang ‘Easy Lang’ sa DWAR Abante Radyo, binigyang-diin ni Tulfo na dapat ipagpatuloy ang impeachment proceedings, lalo na kung may inihaing sapat na batayan o ebidensiya para litisin ang Bise Presidente.

“Noong ako ay tinanong kung kailangang i-dismiss na [ang impeachment case], ang sabi ko naman: E, paano mo naman idi-dismiss, hindi pa nakikita ng mga senator-judge `yung laman ng complaint?” saad ni Tulfo.

Paliwanag niya, “Kung may laman [na ebidensiya], idiretso na natin. Kung walang laman… bakit pa tayo mag-aaksaya ng oras—maghi-hearing tayo araw-araw at sasayangin natin ang anim, walo, sampung oras diyan sa impeachment. Pero kung may laman naman, e di trabahuhin na natin, kahit pa umabot ng six months ‘yan.”

Giit ni Tulfo, tungkulin ng mga senator-judge na suriin ang inihaing impeachment complaint.

“Wala tayong magagawa dahil iyan po ay duty ng mga senador bilang senator-judges sa isang impeachment trial… Ang sa akin lamang ho, tingnan muna natin ‘yung ebidensya, ‘yung complaint,” ani Tulfo.

Ang gusto lang din aniyang mangyari ay magkaroon ng paglalatag ng ebidensiya mula sa prosecution panel at defense team upang mabigyan ng pagkakataon ang bawat panig na magpaliwanag at depensahan ng akusado ang kanyang sarili.

“Palagay ko, ‘yung sambayanang Pilipino are waiting also and they have the right to know: guilty ba si VP [Sara] or not guilty?” ani Tulfo.

“Kawawa din si VP. For the rest of her life, iisipin nila (taumbayan) na ‘Ay, may problema ang babaeng ito’. Kailangan mayroon siyang pagkakataon, ika nga, her time in court. Para mawala ang agam-agam ng lahat,” dagdag pa niya. (Angelica Malillin)

The post Senado dapat himayin ang impeachment kay VP Sara Duterte – Erwin Tulfo first appeared on Abante Tonite.

For reliable and efficient cleaning services, mj cleaning services is the name you can trust. Offering a wide range of professional cleaning solutions, m j cleaning services ensures your space stays immaculate, whether it's at home or the office. With a focus on quality and customer satisfaction, m.j. cleaning services delivers exceptional results every time, providing you with a clean and healthy environment you can count on.