13 barangay sa Ilocos nasa extreme ECQ

Nasa ilalim ng extreme enhanced community quarantine (EECQ) ang 23 barangay sa Cabugao, Ilocos Sur matapos na umabot sa ‘alarming stage’ ang kaso ng COVID-19 at mga variant nito roon, ayon sa Inter-Agency Task Force-Ilocos Sur (IATF-IS).

Sa datos ng IATF-IS at Ilocos Sur Provincial Health Office (IPHO), ang mga barangay na inilagay sa EECQ mula Setyembre 5 ay ang Alinaay, Arnap, Baclig,

Bonifacio, Bunglo, Cacadi­ran, Caellayan, Carusipan, Catucdaan, Cuancabal, Cuantacla, Dacrapan, Dardarat, Margaay, Nam­ruangan, Pug-os, Quezon, Rizal, Sabang, Sagayaden, Salapasap, Salomague, at Turod.

Ayon sa mga aw­toridad, lahat ng resi­dente sa mga lugar na naka-EECQ ay pinag­babawalang lumabas ng kanilang bahay maliban sa emergency at medical purposes.

Saad ng IATF-IS, ban­dang alas-5:00 ng hapon nitong Sabado, nakapag­tala ang Cabugao ng 154 aktibong kaso ng coro­navirus at may 11 indi­bidwal ang minomonitor ang kalagayan.

Napag-alaman na nitong Setyembre 3, inabisuhan ng IPHO si Cabugao Mayor Edgardo Cobangbang Jr. kaugnay sa pagtaas ng kaso ng COVID-19 sa bayan.

Kinumpirma ng IPHO na may naitala na silang dalawang kaso ng CO­VID-19 Delta variant at isang Alpha variant mula sa dalawang barangay.

Dahil dito, nagbaba ng executive order si Co­bangbang na naghahayag ng pagkabahala sa pag­taas ng COVID cases sa kanyang bayan at tamang pagsunod sa lockdown. (Allan Bergonia)

The post 13 barangay sa Ilocos nasa extreme ECQ first appeared on Abante Tonite.