Umiskor ng career-high 50 si Nikola Jokic, pero hindi umubra sa Sacramento.
Limang tres ang pinakawalan ni Harrison Barnes tungo sa 28 points para giyahan ang Kings sa 119-114 panalo laban sa Denver Nuggets sa 2020-21 NBA regular season game sa Golden 1 Center sa California Sabado ng gabi.
May 13 points si Barnes sa third quarter bago ibinaon ang insurance free throws 0.5 seconds na lang sa orasan at pumanhik ang win-loss record ng Kings sa 11-11. Laglag ang Nuggets sa 12-10.
Kinapos ng dalawang rebound si Jokic para kumpletuhin sana ang franchise record 47th triple-double niya sa Denver. Namigay ng 12 assists ang big man. Solo-katawan niyang binalikat ang Nuggets sa dulo, umiskor ng 23 sa fourth pero kinapos pa rin.
“I was just really locked in,” ani Jokic, noong Jan. 31 ay pinantayan ang dating career-best 47 kontra Utah. “In the last quarter I was kind of aggressive.”
Umayuda ng 23 points si Tyrese Haliburton sa Sacramento. (Vladi Eduarte)
0 Comments