Nadakma ng mga tauhan ng Philippine Drug Enforcement Agency (PDEA) ang may 2.5 kilo ng shabu na may street value na P17.2 milyon sa isang controlled delivery operation, na nagresulta rin sa pagkaaresto ng isang drug suspect sa Pasay City noong Biyernes ng hapon.
Kinilala ni PDEA General Director Wilkins Villanueva ang suspek na si Angel Paul Larimer Felismenia alyas Rocky Reyes Marasigan, 24-anyos, at residente ng 2464 M. Dela Cruz St., Pasay City.
Batay sa ulat, dakong alas-4:00 ng hapon (Hulyo 8), nang maganap ang operasyon sa harap ng Cuneta Astrodome sa Roxas Blvd., Service Road, Pasay City.
Nabatid na nagsagawa ng operasyon ang pinagsanib na puwersa ng PDEA RO 3- Pampanga PO, PDEA RO 4-A RSET 1&2,PDEA Clark Inter Agency Drug Interdiction Task Group, BOC Port of Clark, Pasay City Police Station-SDEU, DID at DDEU ng Southern Police District (SPD) na nagresulta ng pagkakaaresto sa suspek.
Naglalaman diumano ang nasabat na package ng mga illegal substance na bumagsak sa Port of Clark sa Pampanga at galing ng Rockville, Maryland, United States noong July 5.
“The parcel was declared as non-perishable chocolates, coffee and sweets,” ayon pa sa ulat ng PDEA.
Inihahanda na ang kasong paglabag sa Republic Act 9165 o The Comprehensive Dangerous Drugs Act of 2002 laban sa suspek. (Dolly Cabreza)
The post 17M shabu galing Amerika nasabat sa Pasay first appeared on Abante Tonite.
0 Comments