Patay ang dalawang lalaking magkamag-anak na parehong taga-Quezon City matapos silang barilin ng mga hindi nakilalang salarin sa loob mismo ng kanilang sasakyan sa Eco-Tourism Road sa Sariaya, Quezon, Huwebes ng hapon.
Batay sa mga nakuhang ID, kinilala ang mga biktimang sina Ace Perez Aceron, 38; at Rodolfo Perez Raval, 74, parehong residente ng Ilocos Sur St., Bago Bantay, QC.
Sa imbestigasyon ng Sariaya PNP, alas-4:20 ng hapon nang makita ang mga bangkay sa loob ng puting Nissan Urvan (NCR 5581) na nakahinto sa gilid ng northbound direction ng Eco-Tourism Road sakop ng Barangay Talaan Aplaya, Sariaya malapit sa boundary ng Lucena City.
Tama ng mga bala sa ulo ang ikinamatay ng nagmamanehong si Aceron samantalang mga tama naman sa likod ang ikinamatay ng nakaupo sa passenger seat na si Raval.
Palaisipan sa pulisya kung bakit nasa Sariaya ang dalawa at kung sino ang mga suspek na posible umanong nasa loob din ng sasakyan nang barilin ang mga biktima dahil narekober sa loob ng sasakyan ang tatlong basyo ng hindi pa tukoy na kalibre ng baril.
Maayos din ang pagkakahinto ng sasakyan sa shoulder ng highway, indikasyon na nakatigil na ang mga ito nang isagawa ang krimen. (Ronilo Dagos)
The post 2 magkapamilya binoga sa kotse first appeared on Abante Tonite.
0 Comments